信報財經新聞
P08 | 房產市道 | 天圓土方 | By 中天 2010-03-16
立法會聽日表決降低強制拍賣門檻至八成，睇怕都凶多吉少，通過嘅成數居多。政府嘅理據有三：①防止最後一個單位嘅業主以一挾四，以至以一挾八，阻住地球轉；②方便重建五十樓齡以上嘅物業；③活化非工業區內三十樓齡以上嘅工廈。
鑑於呢件法例觸及香港資本主義經濟體系嘅根基—被視為神聖不可侵犯嘅私有產權—筆者亦忍唔住要批評呢個求方便、走捷徑心態下產生嘅法例所帶嚟嘅道德風險！
①衰過私有化
證監嘅收購守則都有話：私有化一間公司（即係強拍賣樓嘅「股市版」）係要「無利害關係股份的持有人至少百分之七十五的票數投票批准」，但係同時要求「反對票數不超過無利害關係股份的投票權的百分之十」，目的明顯係要保護小股東唔受大財團欺負剝削。此外，大股東喺收集到三成股權後，已經要頻頻公布自己嘅持股變動，以防小股東被人偷襲！
既然連股票咁「兒戲」嘅產品政府都能夠企出嚟鋤強扶弱，點解喺關乎業主居住生存呢個更重大嘅問題上，政府反而掉轉槍頭，助紂為虐呢？連小小股民都可以以一敵十而捍衞自己權益（例如：電盈私有化事件），點解一個人最後嘅堡壘兼最神聖嘅居住權，都能夠咁兒戲咁被人剝奪？點解政府要咁急住幫人拆卸重建一棟只有五個業主嘅唐樓？係為咗幫測量師攞多啲生意，定係令發展商（包括市建局！）收地容易？
敬請各議員憑良心行事，以防因為「發展就是硬道理」呢個似是而非嘅教條，斷送咗本港私人產權至上呢個數十載累積而來嘅清譽！
②家有一老，如有一寶。
至於方便重建五十樓齡以上建築呢個理由，則頗牽強，君不見紐約、倫敦滿街遍布百年老廈？復修舊建築物唔需要一定要推倒重來；更有性格，更有文化歷史，更令人與人有親密接觸嘅，十之八九皆舊建築而非新功能主義產物。北京大肆活化四合院，新加坡保護「店屋」之際，香港卻以搗毀舊建築為樂，豈不貽笑大方？
所謂「日久失修，投資不足」又或「不能負擔樓宇維修」等等，無一不是克服唔到嘅小障礙（唔信各位去荷李活道同伊利近街間行吓，體會乜嘢叫做真正嘅市區重建），只要維修法例收緊，罰款從嚴，香港邊會需要為樓宇嘅新舊分類而煩惱？
③工廈活化，抓大方向可矣。
最後，第三個原因。其實只要將有需要或有能力變身嘅舊工業區劃成多用途區，並且重拾港府日漸遺忘咗嘅靈活施政思維（如：五年內補地價減半），你駛乜驚個區唔會極速大變天，以私人市場無孔不入嘅創業精神，市建局三十年都做唔到嘅嘢，可以即時呈現喺我哋眼前！
總而結之，連政府所做嘅任何強迫拍賣都要有凌駕性嘅公眾理由，點可能香港政府卻將呢個最低標準喺私人市場放而任之？
如此徒令更少輿論監查，只對利潤效忠嘅利益團體更肆無忌憚，侵犯小市民唯一、
亦可能係最後嘅歸宿■
中天
letstalkproperty@gmail.com http://groups.google.com/group/letstalkproperty
沒有留言:
發佈留言